పశ్చిమాసియాలో ఉద్రిక్తతలు మరింత ముదురుతున్నాయి. ప్రపంచ చమురు రవాణాకు కీలకమైన హార్ముజ్ జలసంధికి తూర్పున ఓ ఆయిల్ ట్యాంకర్ సముద్ర మైన్లను ఢీకొని భారీ మంటల్లో చిక్కుకుందని ఇరాన్ నౌకాదళం ఆదివారం ప్రకటించింది.
ఇరాన్ ఏం చెప్పింది?
- ఆ ట్యాంకర్ గుర్తింపు వ్యవస్థలను ఆపివేసి, నిషిద్ధ ప్రాంతంలోకి ప్రవేశించిందని ఇరాన్ నౌకాదళం ఆరోపించింది.
- అనధికార మార్గంలో వెళ్లిన ఈ ట్యాంకర్ మైన్లను ఢీకొట్టడంతో భారీ మంటలు చెలరేగాయని ఐఆర్జీసీ నేవీ వేరుగా ప్రకటించింది. ఆ మార్గంలో అదే రోజు మైన్లను ఢీకొన్న మూడో ట్యాంకర్ ఇదని పేర్కొంది.
- ముప్పులన్నీ తొలగేవరకు జలసంధిని నౌకలకు మూసే ఉంచుతామని ఇరాన్ హెచ్చరించింది.
ట్యాంకర్ పేరు, అది ఏ దేశానికి చెందినదన్న వివరాలు, ప్రాణనష్టంపై సమాచారం వెల్లడి కాలేదు.
అమెరికా చర్య
మరోవైపు ఇరాన్పై అమెరికా విధించిన నౌకాదిగ్బంధాన్ని పలుమార్లు దాటేందుకు ప్రయత్నించిన సెయింట్ కిట్స్ జెండాతో ఉన్న ఎం/వీ హుదా అనే సరకు రవాణా నౌకను గల్ఫ్ ఆఫ్ ఒమన్లో అమెరికా బలగాలు నిలువరించాయి. హెచ్చరికలను సిబ్బంది పట్టించుకోకపోవడంతో అమెరికా విమానం నౌక వెనుక భాగంపై కచ్చితమైన దాడి చేసిందని సెంట్కామ్ (CENTCOM) తెలిపింది. జులై నుంచి 147 వాణిజ్య నౌకలను దారి మళ్లించామని, ఆదేశాలు పాటించని ఐదు నౌకలను నిలువరించామని వెల్లడించింది.







