న్యూఢిల్లీ: మణిపూర్‌లో కొనసాగుతున్న హింసాకాండపై కాంగ్రెస్ జాతీయ అధ్యక్షుడు మల్లికార్జున ఖర్గే బీజేపీ ప్రభుత్వంపై విరుచుకుపడ్డారు. తాజా ఘటనలో నలుగురు పౌరులు హత్యకు గురికావడాన్ని ఖండించిన ఆయన, బాధిత కుటుంబాలకు ప్రగాఢ సానుభూతి తెలిపారు. "ఈ ఘోర పాలనా వైఫల్యానికి ఎవరు బాధ్యత వహిస్తారు?" అని ప్రధాని నరేంద్ర మోదీ, కేంద్ర హోంమంత్రి అమిత్ షాలను బుధవారం సూటిగా ప్రశ్నించారు.

ఖర్గే సంధించిన మూడు ప్రశ్నలు

  1. 2023 జూన్‌లో అమిత్ షా ఏర్పాటు చేసిన శాంతి కమిటీ ఏమైంది? శాంతి పునరుద్ధరణకు తీసుకున్న నిర్దిష్ట చర్యలేమిటి?
  2. సుప్రీంకోర్టు నియమించిన జస్టిస్ గీతా మిట్టల్ కమిటీ సిఫార్సులపై ఏం చర్యలు తీసుకున్నారు? సహాయ శిబిరాల్లో 31 అసహజ మరణాలను సుప్రీంకోర్టు ప్రస్తావించినా, వేలాది మంది ఇంకా నిరాశ్రయులుగానే ఎందుకున్నారు?
  3. మూడేళ్లకు పైగా హింస, 300కు పైగా మరణాలు, రాష్ట్రపతి పాలన, ముఖ్యమంత్రి మార్పు తర్వాత కూడా బాధ్యత ఎవరిది?

సహాయ శిబిరాల్లో దుర్భర పరిస్థితులు

2023 మే నుంచి మణిపూర్‌లో 300 మందికి పైగా ప్రాణాలు కోల్పోయారని, ఇప్పటికీ 24,530 మంది సహాయ శిబిరాల్లో దుర్భర పరిస్థితుల్లో జీవిస్తున్నారని ఖర్గే పేర్కొన్నారు. హింస మొదలైన తర్వాత దాదాపు 29 నెలల పాటు ప్రధాని మోదీ మణిపూర్‌ను సందర్శించలేదని విమర్శించారు. శాంతిభద్రతలు, జాతీయ భద్రత విషయంలో బీజేపీ ఘోరంగా విఫలమైందని ఆరోపించారు.

48 గంటల బంద్

మరోవైపు ఖోంగ్‌బల్ తంగ్‌ఖుల్ ప్రాంతంలో జరిగిన దాడిలో ముగ్గురు మైతేయి వర్గీయులు మృతి చెందగా, పలువురు గాయపడ్డారు. దీనికి నిరసనగా నేటివ్ పీపుల్స్ కమిటీ మణిపూర్ (ఎన్‌పీసీఎం) అక్టోబర్ 19 అర్ధరాత్రి నుంచి 48 గంటల రాష్ట్రవ్యాప్త బంద్‌కు పిలుపునిచ్చింది. దుకాణాలు, బ్యాంకులు, పాఠశాలలు, కార్యాలయాలు మూతపడగా, అంతర్రాష్ట్ర రోడ్డు రవాణా నిలిచిపోయింది. విమాన సర్వీసులు, అత్యవసర సేవలకు మినహాయింపు ఇచ్చారు. లోయ ప్రాంతాల్లో బంద్ ప్రభావం ఎక్కువగా కనిపించింది.