హైదరాబాద్: తెలంగాణ విద్యుత్ రంగంలో మరో కీలక ముందడుగు పడింది. 4,000 మెగావాట్ల సామర్థ్యంతో నిర్మిస్తున్న యాదాద్రి థర్మల్ విద్యుత్ కేంద్రంలోని 800 మెగావాట్ల ఐదో యూనిట్ను దసరా పండుగ సందర్భంగా గ్రిడ్కు విజయవంతంగా అనుసంధానం (సింక్రనైజేషన్) చేశారు. ఈ ప్రాజెక్టుకు సంబంధించి బీహెచ్ఈఎల్ రూ.20,400 కోట్ల ఆర్డర్ దక్కించుకుంది.
కేసీఆర్ దార్శనికతకు నిదర్శనం: కేటీఆర్
ఐదో యూనిట్ సింక్రనైజేషన్ను బీఆర్ఎస్ వర్కింగ్ ప్రెసిడెంట్ కె.టి. రామారావు (కేటీఆర్) 'ఎక్స్' వేదికగా స్వాగతించారు. ఇది పార్టీ అధ్యక్షుడు, మాజీ ముఖ్యమంత్రి కె. చంద్రశేఖర్ రావు దార్శనికతకు నిదర్శనమని పేర్కొన్నారు. తెలంగాణ విస్తరిస్తున్న విద్యుత్ ఉత్పత్తి సామర్థ్యానికి యాదాద్రి ఒక ప్రతీక అని అభివర్ణించారు. బీఆర్ఎస్ పాలనలో పదేళ్లలో రాష్ట్ర స్థాపిత విద్యుత్ సామర్థ్యం 2014లో 7,778 మెగావాట్ల నుంచి దాదాపు 20,000 మెగావాట్లకు పెరిగిందని గుర్తుచేశారు.
కోల్ ఇండియా బొగ్గు సరఫరాకు అంగీకారం
విద్యుత్ సంక్షోభం నేపథ్యంలో యాదాద్రి ప్లాంట్కు ఏటా 50 లక్షల టన్నుల బొగ్గు సరఫరా చేసేందుకు కోల్ ఇండియా సూత్రప్రాయంగా అంగీకరించింది. ఒడిశాలోని మహానది కోల్ఫీల్డ్స్ నుంచి ఈ బొగ్గు రానుంది. ప్లాంట్కు అవసరమైన జీ-9 గ్రేడ్ బొగ్గును తమ గనుల్లో ఉత్పత్తి చేయడం లేదని సింగరేణి కాలరీస్ కంపెనీ ఇప్పటికే టీజీ జెన్కోకు తెలియజేసింది.







