బంగాళాఖాతంలో ఏర్పడిన తీవ్ర వాయుగుండం ప్రభావంతో తెలంగాణలోనూ భారీ వర్షాలు కురుస్తున్నాయి. మహబూబాబాద్ జిల్లాకు భారత వాతావరణ శాఖ (ఐఎండీ) రెడ్ అలర్ట్ జారీ చేసింది. రాబోయే 24 గంటల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది.
పాఠశాలలకు సెలవు
రెడ్ అలర్ట్ నేపథ్యంలో జిల్లా కలెక్టర్ ఆదేశాల మేరకు మహబూబాబాద్ జిల్లాలోని అన్ని ప్రభుత్వ, ఎయిడెడ్, ప్రైవేట్ పాఠశాలలకు గురువారం సెలవు ప్రకటించారు. ఆదేశాలను ఉల్లంఘించి తరగతులు నిర్వహిస్తే చర్యలు తప్పవని జిల్లా విద్యాశాఖాధికారి (డీఈవో) హెచ్చరించారు. వాగులు, వంకలు పొంగిపొర్లే అవకాశం ఉన్నందున అప్రమత్తంగా ఉండాలని సూచించారు. ఖమ్మం జిల్లాలోనూ పాఠశాలలకు సెలవు ప్రకటించారు.
కేయూ పరీక్షలు వాయిదా
భారీ వర్షాల కారణంగా కాకతీయ విశ్వవిద్యాలయం పరీక్షలను వాయిదా వేసింది. సవరించిన తేదీలను తర్వాత వెల్లడించనున్నారు.







