హైదరాబాద్ రియల్ ఎస్టేట్ మార్కెట్లో మరో సంచలన రికార్డు నమోదైంది. రాయదుర్గంలోని ఒక ప్రాంతంలో తెలంగాణ పారిశ్రామిక మౌలిక సదుపాయాల సంస్థ (TGIIC) నిర్వహించిన ఈ-వేలంలో ఎకరం భూమి ఏకంగా రూ.264 కోట్లకు అమ్ముడైంది. హైదరాబాద్ చరిత్రలో ఇప్పటివరకు ఏ ప్రభుత్వ భూమికి కూడా ఇంత అధిక ధర పలకలేదని అధికారులు చెబుతున్నారు.
MSTC ఆన్లైన్ వేదిక ద్వారా నిర్వహించిన ఈ వేలంలో P1 ప్లాట్గా గుర్తించిన 5.25 ఎకరాల బహుళ అవసరాల భూమిని విక్రయించారు. జేఎల్ఎల్ సంస్థ ఈ లావాదేవీకి సలహాదారుగా వ్యవహరించింది. ఎకరాకు రూ.175 కోట్లుగా నిర్ణయించిన కనీస ధర, పోటీ బిడ్డింగ్తో రూ.264 కోట్లకు చేరింది. అంటే కనీస ధర కంటే 50.9 శాతం అధికంగా బిడ్ దక్కింది. మొత్తం 5.25 ఎకరాలకు గాను TGIICకి రూ.1,386 కోట్ల ఆదాయం లభించింది.
ఇంతకుముందు ఈ ఏడాది మే నెలలో TGIIC నిర్వహించిన వేలంలో ఎకరాకు రూ.237 కోట్లు పలకడం రికార్డుగా నిలిచింది. తాజా వేలంతో ఆ రికార్డు బద్దలైంది. గత కొన్నేళ్లుగా రాయదుర్గం, ఫైనాన్షియల్ డిస్ట్రిక్ట్, గచ్చిబౌలి ప్రాంతాల్లో ఐటీ, రియల్ ఎస్టేట్ కంపెనీల డిమాండ్ పెరగడంతో భూముల ధరలు క్రమంగా పెరుగుతూ వస్తున్నాయి.








