హైదరాబాద్: ఆన్లైన్ ఫుడ్ డెలివరీ, క్యాబ్, ఈ-కామర్స్ సంస్థల్లో పనిచేసే గిగ్, ప్లాట్ఫాం కార్మికుల సంక్షేమం దిశగా తెలంగాణ ప్రభుత్వం మరో కీలక అడుగు వేయనుంది. లోక్సభ ప్రతిపక్ష నేత రాహుల్ గాంధీ ఈ నెల 14న హైదరాబాద్లో గిగ్ వర్కర్లతో నిర్వహించే భారీ సభలో పాల్గొననున్నారు. హైదరాబాద్ ఇంటర్నేషనల్ కన్వెన్షన్ సెంటర్ (హెచ్ఐసీసీ) పక్కనే, జయభేరి, మీనాక్షి టవర్స్ సమీపంలోని మైదానంలో ఈ సభ జరగనుంది.
ఏర్పాట్లను పరిశీలించిన మంత్రులు
బీసీ సంక్షేమ శాఖ మంత్రి పొన్నం ప్రభాకర్, కార్మిక శాఖ మంత్రి గడ్డం వివేక్ వెంకటస్వామి గురువారం సభా ప్రాంగణాన్ని సందర్శించి ఏర్పాట్లను పరిశీలించారు. సభ సన్నద్ధతపై అధికారులతో సమీక్షించారు. గిగ్ కార్మికుల సామాజిక భద్రత, సంక్షేమం లక్ష్యంగా రూపొందించిన నిబంధనలు, సంక్షేమ పథకాలను రాహుల్ గాంధీ చేతుల మీదుగా ప్రారంభించాలని ప్రభుత్వం భావిస్తోంది. సభలో రాహుల్ డెలివరీ ఎగ్జిక్యూటివ్లు, క్యాబ్ డ్రైవర్లు, ఇతర ప్లాట్ఫాం కార్మికులతో నేరుగా ముచ్చటించనున్నారు.
చట్టం అమలులో కీలక దశ
- ‘తెలంగాణ ప్లాట్ఫాం ఆధారిత గిగ్ వర్కర్ల (రిజిస్ట్రేషన్, సామాజిక భద్రత, సంక్షేమం) చట్టం, 2026’ ఈ ఏడాది ఆమోదం పొంది జూన్ 2 నుంచి అమల్లోకి వచ్చింది.
- చట్టం అమలుకు అవసరమైన నిబంధనలు, గిగ్ వర్కర్ల సంక్షేమ బోర్డు ఏర్పాటును నవంబర్ 14న అధికారికంగా నోటిఫై చేయనున్నారు.
- దీంతో చట్టం పూర్తిస్థాయిలో అమల్లోకి వచ్చే ప్రక్రియ మొదలవుతుంది.
‘మూడేళ్ల పోరాటం ఫలిస్తోంది’
గిగ్ కార్మికులకు ఇచ్చిన హామీలు ఇప్పుడు నెరవేరే దశకు చేరుకున్నాయని తెలంగాణ గిగ్ అండ్ ప్లాట్ఫాం వర్కర్స్ యూనియన్ వ్యవస్థాపక అధ్యక్షుడు షేక్ సలావుద్దీన్ తెలిపారు. మూడేళ్ల సుదీర్ఘ పోరాటం తర్వాత అమలు సమయం ఆసన్నమైందని, కేంద్ర, రాష్ట్ర స్థాయిల్లో కార్మికులు ఇందుకోసం ఉద్యమించారని గుర్తుచేశారు. ప్రమాదాల్లో మరణించిన ఎనిమిది మంది గిగ్ కార్మికుల కుటుంబాలకు ప్రభుత్వం ఇప్పటికే ఒక్కొక్కరికి రూ.5 లక్షల చొప్పున పరిహారం అందించిందని, మరో నాలుగు కేసులు ప్రాసెస్లో ఉన్నాయని, ఇది సానుకూల పరిణామమని చెప్పారు. ఈ సభను రాజకీయ ప్రమేయం లేకుండా కార్మికులే స్వయంగా నిర్వహిస్తున్నారని, రాష్ట్రం నలుమూలల నుంచి గిగ్ వర్కర్లు తరలివస్తారని ఆయన తెలిపారు.







