హైదరాబాద్: ఆంధ్రప్రదేశ్ తీరం వైపు దూసుకొస్తున్న తీవ్ర తుపాను 'మురసు' ప్రభావం తెలంగాణపైనా పడనుంది. నవంబర్ 2 మధ్యాహ్నం నుంచి తుపాను ప్రభావం పెరిగి, నవంబర్ 4 అర్ధరాత్రి వరకు కొనసాగుతుందని వాతావరణ అంచనాలు చెబుతున్నాయి. ముఖ్యంగా దక్షిణ తెలంగాణ జిల్లాల్లో మూడు రోజుల పాటు భారీ వర్షాలు కురిసే అవకాశం ఉంది.
జిల్లాల వారీగా అంచనా
- నల్గొండ, నాగర్కర్నూల్, సూర్యాపేట, వనపర్తి జిల్లాల్లో కొన్ని చోట్ల భారీ నుంచి అతి భారీ వర్షాలు
- నవంబర్ 2న తూర్పు, దక్షిణ, మధ్య తెలంగాణ జిల్లాల్లో మోస్తరు వర్షాలు
- హైదరాబాద్ సహా మధ్య తెలంగాణ జిల్లాల్లో మోస్తరు వర్షం
- ఉత్తర తెలంగాణలో తేలికపాటి జల్లులు
ప్రజలకు సూచనలు
భారీ వర్షాలు కురిసే జిల్లాల్లో లోతట్టు ప్రాంతాల ప్రజలు అప్రమత్తంగా ఉండాలి. వాగులు, వంకలు పొంగే అవకాశం ఉన్నందున ప్రవాహాలను దాటే ప్రయత్నం చేయవద్దు. కోతకు వచ్చిన పంటలను రైతులు సురక్షిత ప్రాంతాలకు తరలించుకోవాలి. ఉరుములు, మెరుపుల సమయంలో చెట్ల కింద నిలబడవద్దు.
తీవ్ర తుపాను మురసు నవంబర్ 2 అర్ధరాత్రి నుంచి 3వ తేదీ తెల్లవారుజాము మధ్య ఏపీలోని నెల్లూరు–నర్సాపూర్ మధ్య తీరం దాటే అవకాశం ఉందని భారత వాతావరణ శాఖ ఇప్పటికే ప్రకటించింది. తీరం దాటిన తర్వాత బలహీనపడుతూ లోపలి ప్రాంతాల వైపు కదిలే క్రమంలో తెలంగాణ దక్షిణ జిల్లాలపై ప్రభావం చూపనుంది.







