దక్షిణాది రాష్ట్రాల సమగ్రాభివృద్ధికి బాటలు వేసేలా ముఖ్యమంత్రి నారా చంద్రబాబు నాయుడు కీలక ప్రతిపాదనలు తెరపైకి తెచ్చారు. తమిళనాడులోని మహాబలిపురం వేదికగా కేంద్ర హోంమంత్రి అమిత్ షా అధ్యక్షతన జరిగిన 31వ సదరన్ జోనల్ కౌన్సిల్ సమావేశంలో ఆయన మాట్లాడుతూ, సహకారం, సమన్వయంతోనే దక్షిణాది రాష్ట్రాలు మరింత వేగంగా ఆర్థిక ప్రగతి సాధించగలవని పేర్కొన్నారు. ఈ భేటీలో తమిళనాడు, కర్ణాటక, కేరళ, పుదుచ్చేరి ముఖ్యమంత్రులు కూడా పాల్గొన్నారు. ఆంధ్రప్రదేశ్, కర్ణాటక, తమిళనాడు రాష్ట్రాలను అనుసంధానిస్తూ కుప్పం మీదుగా అత్యాధునిక బుల్లెట్ ట్రైన్ కారిడార్‌ను ఏర్పాటు చేయాలని చంద్రబాబు కేంద్రానికి ప్రతిపాదించారు. ఈ కారిడార్ ద్వారా అమరావతి-బెంగళూరు-చెన్నై నగరాలను నేరుగా కలిపే సమగ్ర రవాణా వ్యవస్థను అభివృద్ధి చేయాలని సూచించారు. వేగవంతమైన రవాణా ఏర్పాటైతే వాణిజ్యం, పారిశ్రామిక అభివృద్ధి, పర్యాటక రంగాలకు మరింత ఊతం లభిస్తుందని ఆయన అభిప్రాయపడ్డారు. దీంతో పాటు దక్షిణాది రాష్ట్రాల మధ్య ఉమ్మడి లాజిస్టిక్స్ నెట్‌వర్క్, డ్రై పోర్టుల ఏర్పాటుపైనా ఆయన ప్రతిపాదనలు చేశారు. గోదావరి-కావేరి నదుల అనుసంధానంపైనా చంద్రబాబు కీలక సూచనలు చేశారు. అలాగే దుగ్గరాజుపట్నం పోర్టు, రిఫైనరీ ప్రతిపాదనలకు వేగంగా అనుమతులు మంజూరు చేయాలని కేంద్రాన్ని కోరారు. దక్షిణాది ప్రాంత సమగ్రాభివృద్ధికి దిక్సూచిగా నిలిచే ఈ బ్లూప్రింట్ ప్రధాన ఆకర్షణగా నిలవగా, సమావేశంలో పాల్గొన్న ఇతర దక్షిణాది రాష్ట్రాల ముఖ్యమంత్రులు సైతం చంద్రబాబు ప్రసంగాన్ని ప్రశంసించారు.