హైదరాబాద్: తెలంగాణ ప్రభుత్వం ఆతిథ్యమిస్తున్న రెండో భారత్ సమ్మిట్ శుక్రవారం హైదరాబాద్లో ఘనంగా ప్రారంభమైంది. మాజీ విదేశాంగ మంత్రి సల్మాన్ ఖుర్షీద్ ప్లీనరీ ప్రసంగంతో సదస్సు మొదలైంది. ‘ఫోర్జింగ్ ఎ న్యూ వరల్డ్’ (కొత్త ప్రపంచ నిర్మాణం) ఇతివృత్తంతో జరుగుతున్న ఈ సదస్సుకు దాదాపు 70 దేశాల నుంచి సుమారు వెయ్యి మంది విధాన నిర్ణేతలు, రాజకీయ ప్రతినిధులు, మేధావులు, మేధోసంస్థల ప్రతినిధులు హాజరయ్యారు. స్వాతంత్య్రం వచ్చిన 80వ సంవత్సరంలో ఈ సదస్సును నిర్వహిస్తుండగా, ముగింపు రోజైన శనివారం దేశ తొలి ప్రధాని జవహర్లాల్ నెహ్రూ 137వ జయంతి కావడం విశేషం.
నెహ్రూ స్ఫూర్తిని గుర్తుచేసిన సీఎం
తొలి భారత్ సమ్మిట్ బాండుంగ్ సదస్సుకు 70 ఏళ్లు పూర్తయిన సందర్భంగా జరిగిందని, ఆ సదస్సే అలీనోద్యమానికి పునాది వేసిందని ముఖ్యమంత్రి ఎ.రేవంత్ రెడ్డి గుర్తుచేశారు. ‘‘కొత్తగా స్వాతంత్య్రం పొందిన దేశాలు ఏదో ఒక పక్షాన్ని ఎంచుకోవాల్సిన ఒత్తిడిలో ఉన్న సమయంలో నెహ్రూ వాటిని ఏకతాటిపైకి తెచ్చారు. సొంత నిర్ణయాలు తీసుకునే హక్కు, కలిసి పనిచేసే బాధ్యత ఆ దేశాలకు ఉన్నాయని ఆయన విశ్వసించారు’’ అని రేవంత్ పేర్కొన్నారు. సదస్సు నిర్వహణలో సహకరిస్తున్న ఉపముఖ్యమంత్రి మల్లు భట్టి విక్రమార్క, మంత్రి డి.శ్రీధర్ బాబు, టీపీసీసీ అధ్యక్షుడు బి.మహేశ్ కుమార్ గౌడ్లను అభినందించారు.
ఏఐ నుంచి ఫ్యూచర్ సిటీ వరకు
తొలి రోజు హెచ్ఐసీసీలో ఏడు అంతర్జాతీయ ప్యానెల్ చర్చలు జరిగాయి. కృత్రిమ మేధ, వాతావరణ మార్పులు, రాజకీయాల్లో యువత భాగస్వామ్యం, బహుళపక్ష సంస్థలు, లింగ న్యాయం వంటి అంశాలపై నిపుణులు చర్చించారు. హైటెక్స్లో జరిగిన నాలుగు ‘తెలంగాణ రైజింగ్’ సెషన్లలో ఫ్యూచర్ సిటీ, పట్టణీకరణ–ఆర్థిక న్యాయం వంటి అంశాలపై చర్చ సాగింది. ‘ఇండియా అండ్ ది వరల్డ్’ ఎక్స్పోను కూడా ప్రారంభించారు. కాంగ్రెస్ నేతలు గౌరవ్ గొగోయ్, దీపేందర్ హుడా, జోతిమణి, సుప్రియా శ్రీనేత్, మంత్రి ఉత్తమ్ కుమార్ రెడ్డి తదితరులు చర్చల్లో పాల్గొన్నారు.







