మాజీ మంత్రి వైఎస్ వివేకానందరెడ్డి హత్య కేసులో నగదు లావాదేవీలు, హవాలా అనుమానాస్పద మార్గాల ఆచూకీ కోసం ఈడీ హైదరాబాద్ జోనల్ బృందాలు శుక్రవారం పలుచోట్ల సోదాలు నిర్వహించాయి. హైదరాబాద్‌లో ఆరు చోట్ల, ఏపీలో నాలుగు చోట్ల (ప్రధానంగా కడప జిల్లా పులివెందుల) దాడులు జరిగాయి. వీటిలో వైఎస్సార్‌సీపీ ఎంపీ వైఎస్ అవినాష్‌రెడ్డికి చెందిన కోకాపేట విల్లా, పులివెందుల నివాసం ఉన్నాయి. సీబీఐ దర్యాప్తు ఆధారంగా ఈడీ మనీలాండరింగ్ కేసు నమోదు చేసింది. నిందితులకు చెల్లించారని ఆరోపించిన రూ.4 కోట్లు హవాలా ద్వారా చేతులు మారిందా అన్న కోణంలో ఆర్థిక పత్రాలను పరిశీలిస్తున్నారు. దీనిపై అధికారికంగా ఎలాంటి ప్రకటనా వెలువడలేదు.