అనంతపురం: రాష్ట్రవ్యాప్తంగా తీవ్ర కలకలం రేపిన రాప్తాడు పాఠశాల దాడి కేసులో నిందితుడిని పోలీసులు అరెస్టు చేశారు. అక్టోబర్ 31న రాప్తాడు జిల్లా పరిషత్ ఉన్నత పాఠశాలలో తరగతి గదిలోకి చొరబడి పదో తరగతి విద్యార్థినులపై రంపంతో దాడి చేసిన హేమంత్ (21)ను ఆదివారం సాయంత్రం ఆత్మకూరు అటవీ ప్రాంతంలో పట్టుకున్నారు.
అసలేం జరిగింది?
శనివారం ఉదయం సుమారు 10 గంటల సమయంలో తరగతులు జరుగుతుండగా హేమంత్ చేతిలో రంపంతో పాఠశాలలోకి ప్రవేశించాడు. పదో తరగతి గదిలోకి వెళ్లి ఓ విద్యార్థినిపై దాడి చేశాడు. ఆమెను కాపాడేందుకు ప్రయత్నించిన మరో విద్యార్థిని కూడా గాయపడింది. దాడి అనంతరం రంపాన్ని తరగతి గదిలోనే వదిలేసి నిందితుడు పరారయ్యాడు. తీవ్రంగా గాయపడిన విద్యార్థినికి అనంతపురం ప్రభుత్వ సర్వజన ఆస్పత్రిలో ప్రాథమిక చికిత్స అందించి, గ్రీన్ కారిడార్ ద్వారా బెంగళూరులోని ప్రైవేటు ఆస్పత్రికి తరలించారు.
అడవిలో నక్కిన నిందితుడు
శనివారం నుంచి ప్రత్యేక బృందాలు గాలిస్తుండగా, ఆదివారం సాయంత్రం 6 నుంచి 6.30 గంటల మధ్య నిందితుడు ఆత్మకూరు అటవీ ప్రాంత శివార్లలో దాక్కున్నట్లు సమాచారం అందిందని అనంతపురం ఎస్పీ జగదీష్ వెల్లడించారు. పోలీసులు దగ్గరకు వెళ్లగా మద్యం మత్తులో ఉన్న నిందితుడు కత్తితో సిబ్బందిపై దాడికి దిగాడని, ఈ ఘటనలో ఓ ఇన్స్పెక్టర్ గాయపడ్డారని తెలిపారు. దీంతో పోలీసులు కాల్పులు జరిపి అతడిని అదుపులోకి తీసుకున్నారు.







