న్యూఢిల్లీ: స్వచ్ఛ ఇంధన పెట్టుబడులు, సాంకేతికత, తయారీ రంగంలో భారత్‌ను ప్రపంచ కేంద్రంగా నిలపాలన్న లక్ష్యంతో కేంద్ర నూతన, పునరుత్పాదక ఇంధన మంత్రిత్వ శాఖ (ఎంఎన్ఆర్ఈ) నిర్వహిస్తున్న 'భారత్ రెన్యూవబుల్ ఎనర్జీ సమ్మిట్ & ఎక్స్‌పో 2026'ను ప్రధాని నరేంద్ర మోదీ సోమవారం ప్రారంభించనున్నారు. ఢిల్లీలోని భారత్ మండపంలో నవంబర్ 2 నుంచి 5 వరకు నాలుగు రోజుల పాటు ఈ సదస్సు జరగనుంది.

సదస్సు ముఖ్యాంశాలు

  • 130కు పైగా దేశాల నుంచి ప్రతినిధులు, 40 మందికి పైగా మంత్రుల హాజరు
  • 400కు పైగా ఎగ్జిబిటర్లతో ఎక్స్‌పో – సౌర, పవన విద్యుత్, గ్రీన్ హైడ్రోజన్, ఇంధన నిల్వ రంగాల ఆధునిక సాంకేతికతల ప్రదర్శన
  • ప్లీనరీ సెషన్లు, మంత్రుల స్థాయి చర్చలు, సీఈవో రౌండ్‌టేబుల్స్, దేశాలు–రాష్ట్రాల ప్రత్యేక సెషన్లు
  • భారత్ ఆర్ఈ హ్యాకథాన్ 2026 విజేతలకు సత్కారం, జాతీయ పునరుత్పాదక ఇంధన క్విజ్ ఫైనల్

ఆర్ఈ-ఇన్వెస్ట్ వారసత్వంగా

దేశ ప్రతిష్ఠాత్మక పునరుత్పాదక ఇంధన పెట్టుబడుల సదస్సు 'ఆర్ఈ-ఇన్వెస్ట్' స్ఫూర్తితో, మరింత విస్తృత వేదికగా భారత్ ఆర్ఈ 2026ను రూపొందించారు. ఇదే సమయంలో అంతర్జాతీయ సౌర కూటమి (ఐఎస్ఏ) అసెంబ్లీ సౌర ఇంధనంలో అంతర్జాతీయ సహకారం, ఆర్థిక వనరులపై చర్చించనుంది. పునరుత్పాదక ఇంధనం, సౌర విద్యుత్ స్థాపిత సామర్థ్యంలో భారత్ ప్రపంచంలో మూడో స్థానంలో, పవన విద్యుత్‌లో నాలుగో స్థానంలో ఉంది.