విజయనగరం నియోజకవర్గంలో తెలుగుదేశం పార్టీ కార్యకర్తల సమావేశంలో మంత్రి నారా లోకేష్ మాట్లాడుతూ, డీఎస్సీ నియామకాలపై చర్చకు సిద్ధంగా ఉన్నానని, సమయం, తేదీ జగన్ నిర్ణయించుకోవచ్చని, తాడేపల్లి పాలెస్ నుంచి బయటకు రావాలని సవాలు విసిరారు. ఐదేళ్ల సీఎంగా ఉన్న సమయంలో జగన్ ఒక్క ఉపాధ్యాయ పోస్టును కూడా భర్తీ చేయలేదని, ప్రస్తుత ప్రభుత్వం పారదర్శకంగా 16,000 పోస్టుల భర్తీ చేపడుతుంటే దానిపై తప్పుడు ప్రచారం చేస్తున్నారని ఆరోపించారు. డీఎస్సీ, ఏపీపీఎస్సీ మధ్య తేడా తెలియకుండా జగన్ విమర్శలు చేస్తున్నారని లోకేష్ ఎద్దేవా చేశారు. భోగాపురం అంతర్జాతీయ విమానాశ్రయం, విశాఖ స్టీల్ ప్లాంట్ పరిరక్షణ వంటి ఉత్తరాంధ్ర అభివృద్ధి ప్రాజెక్టులపై ప్రభుత్వ నిబద్ధతను పునరుద్ఘాటించారు.