దేశంలో పరీక్షల నిర్వహణ వ్యవస్థను సమూలంగా సంస్కరించేందుకు కేంద్ర ప్రభుత్వం ఏర్పాటు చేసిన ఉన్నతస్థాయి టాస్క్ఫోర్స్ (హెచ్పీటీఎఫ్) ఛైర్మన్ నందన్ నీలేకని బుధవారం అమరావతిలోని సచివాలయంలో ముఖ్యమంత్రి నారా చంద్రబాబు నాయుడును కలిశారు. విద్యాశాఖ మంత్రి నారా లోకేశ్ ఆయనకు స్వాగతం పలికారు. టాస్క్ఫోర్స్ సభ్యులతో కలిసి సీఎం సుదీర్ఘంగా చర్చించారు.
రాష్ట్రాల అభిప్రాయాలు తప్పనిసరి
దేశంలోని భాషా వైవిధ్యం, ప్రాంతీయ అవసరాలను దృష్టిలో ఉంచుకుని అన్ని రాష్ట్రాల ఏకాభిప్రాయంతో పారదర్శకమైన, విశ్వసనీయమైన పరీక్షల వ్యవస్థను రూపొందించాలని చంద్రబాబు సూచించారు. ప్రతి విద్యార్థికీ సమాన అవకాశాలు దక్కాలన్నారు. సంస్కరణలు కేవలం పరీక్షలకే పరిమితం కాకుండా ఉపాధి అవకాశాలు పెంచేలా మొత్తం విద్యావ్యవస్థకు విస్తరించాలని అభిప్రాయపడ్డారు.
టాస్క్ఫోర్స్ దృష్టి సారించిన అంశాలు
- ప్రశ్నపత్రాల లీకుల నివారణ
- పరీక్షల నిర్వహణలో సాంకేతికత సమర్థ వినియోగం
- సైబర్ భద్రత బలోపేతం, డిజిటల్ ఫోరెన్సిక్స్ మెరుగుదల
- పరీక్ష మౌలిక సదుపాయాల విస్తరణ, విద్యార్థుల మానసిక శ్రేయస్సు
వివిధ రాష్ట్రాల్లో పర్యటిస్తూ అక్కడి పరీక్షల విధానాలు, సవాళ్లు, సూచనలను సేకరిస్తున్నామని, వాటి ఆధారంగా జాతీయ ఫ్రేమ్వర్క్ రూపొందిస్తామని నీలేకని తెలిపారు. ఆంధ్రప్రదేశ్ అమలు చేస్తున్న విధానాలు, సాంకేతిక కార్యక్రమాలపై ఆయన ఆసక్తి కనబరిచారు.







