కాకినాడ: ఎన్నికల్లో గెలిచినా ఆ ఆనందాన్ని చూసేందుకు ఆమె లేరు. జనసేన పార్టీ తరఫున దుమంతినిగూడెం గ్రామ ఎంపీటీసీ స్థానానికి పోటీ చేసిన గారపాటి దివ్య (28) 350 ఓట్ల మెజార్టీతో విజయం సాధించినట్లు శనివారం జరిగిన లెక్కింపులో వెల్లడైంది. కానీ ఫలితం వెలువడటానికి ఒక రోజు ముందే, శుక్రవారం ఆమె మృతి చెందారు.
పోలింగ్ తర్వాత అస్వస్థత
ఎంపీటీసీ ఎన్నికల్లో విజయం కోసం దివ్య ఇంటింటా తిరిగి విస్తృతంగా ప్రచారం చేశారు. నవంబర్ 5న పోలింగ్ ముగిసిన తర్వాత ఆమె అస్వస్థతకు గురయ్యారు. కుటుంబ సభ్యులు ఆసుపత్రికి తీసుకెళ్లగా, వైద్యులు గ్యాస్ట్రిక్ నొప్పిగా నిర్ధారించి మందులు రాసి ఇంటికి పంపారు.
అయినా పరిస్థితి మెరుగుపడకపోవడంతో ఆమెను రాజమహేంద్రవరంలోని ఆసుపత్రికి తరలించారు. అక్కడ చికిత్స పొందుతూ ఆమె కన్నుమూశారు. గుండె వైఫల్యమే మృతికి కారణమని వైద్యులు తెలిపారు.







