ఆంధ్రప్రదేశ్ను అంతర్జాతీయ పెట్టుబడులకు, వాణిజ్యానికి, సాంకేతిక భాగస్వామ్యాలకు కేంద్రంగా నిలపాలనే లక్ష్యంతో విశాఖపట్నం వేదికగా 31వ సీఐఐ భాగస్వామ్య సదస్సు–2026 నవంబర్ 12, 13 తేదీల్లో జరగనుంది. 'నావిగేటింగ్ న్యూ వరల్డ్ ఆర్డర్: ట్రేడ్, టెక్నాలజీ, ట్రస్ట్' ఇతివృత్తంతో ఈ రెండు రోజుల సదస్సు నిర్వహిస్తున్నారు.
సదస్సు ముఖ్యాంశాలు
- సుమారు 59 దేశాల నుంచి 1,250 మంది ప్రతినిధులు
- 15 మంది విదేశాంగ మంత్రులు, 40 మందికిపైగా అంతర్జాతీయ వక్తలు
- 350 మంది విదేశీ, 900 మంది భారతీయ ప్రతినిధులు
- దాదాపు 400 బిజినెస్–టు–బిజినెస్ (బీ2బీ) సమావేశాలు, బిజినెస్–టు–గవర్నమెంట్ (బీ2జీ) సెషన్లు
- ప్రపంచ ఆహార కార్యక్రమం, ఆసియా అభివృద్ధి బ్యాంకు, ఐరాస పర్యావరణ కార్యక్రమం ప్రతినిధుల హాజరు
సింగపూర్, నేపాల్, కంబోడియా, మయన్మార్, యూఏఈ, కెనడా, స్లోవాక్ రిపబ్లిక్, మారిషస్, మొజాంబిక్, ఈజిప్ట్, అల్జీరియా, టాంజానియా, గ్వాటెమాలా దేశాల ప్రతినిధులు బీ2బీ చర్చల్లో పాల్గొననున్నారు.
సీఎం చంద్రబాబు దిశానిర్దేశం
శనివారం తన క్యాంపు కార్యాలయంలో సదస్సు ఏర్పాట్లు, చర్చాంశాలు, ముసాయిదా డిక్లరేషన్లపై సీఐఐ డైరెక్టర్ జనరల్ చంద్రజిత్ బెనర్జీ, ఉన్నతాధికారులతో సీఎం సమీక్షించారు. విధాన రూపకర్తలు, పెట్టుబడిదారులు, పరిశ్రమలు, విద్యాసంస్థలు, స్టార్టప్లను ఒకే వేదికపైకి తెచ్చి, చర్చలు నిర్దిష్ట వ్యాపార ఒప్పందాలుగా మారేలా చూడాలని ఆయన ఆదేశించారు. రాష్ట్ర పరిశ్రమలను అంతర్జాతీయ మార్కెట్లతో అనుసంధానించాలని, ఎంఎస్ఎంఈలకు కొత్త అవకాశాలు కల్పించాలని సూచించారు.







