మంగళగిరి: పోలీసు అమరవీరుల సంస్మరణ దినోత్సవాన్ని పురస్కరించుకుని గుంటూరు జిల్లా మంగళగిరిలోని ఏపీఎస్పీ 6వ బెటాలియన్ పరేడ్ మైదానంలో బుధవారం నిర్వహించిన కార్యక్రమానికి ముఖ్యమంత్రి నారా చంద్రబాబు నాయుడు హాజరయ్యారు. అమరవీరుల స్మారక స్తూపం వద్ద పుష్పగుచ్ఛాలు ఉంచి నివాళులర్పించారు. విధి నిర్వహణలో ప్రాణాలు కోల్పోయిన పోలీసుల త్యాగాలను స్మరించుకుంటూ మౌనం పాటించారు. హోంమంత్రి వంగలపూడి అనిత, ప్రధాన కార్యదర్శి సాయిప్రసాద్, డీజీపీ హరీష్ కుమార్ గుప్తా తదితర ఉన్నతాధికారులు ఈ కార్యక్రమంలో పాల్గొన్నారు.
భద్రత ఉంటేనే పెట్టుబడులు
ఈ సందర్భంగా సీఎం మాట్లాడుతూ రాష్ట్రం భద్రంగా ఉందన్న నమ్మకం ఉంటేనే పెట్టుబడిదారులు ముందుకు వస్తారని, ఆ పెట్టుబడులే ఉద్యోగాలను సృష్టిస్తాయని అన్నారు. అశాంతి, అభద్రత ఉన్న ప్రాంతాలకు పారిశ్రామికవేత్తలు రారని చెప్పారు. "నేను అధికారంలో ఉన్న ప్రతిసారీ శాంతిభద్రతలకే అత్యధిక ప్రాధాన్యం ఇచ్చాను" అని గుర్తుచేశారు. దేశ భద్రతకు ముప్పు కలిగించే కుట్రలను రాష్ట్ర కౌంటర్ ఇంటెలిజెన్స్ విభాగం భగ్నం చేసిందని ప్రశంసించారు.
నేరగాళ్లకు రాజకీయ రక్షణ ఉండదు
రాజకీయం ముసుగులో జరిగే నేరాలను సహించవద్దని, రాజకీయం ఎప్పుడూ నేరగాళ్లకు రక్షణ కవచం కాకూడదని చంద్రబాబు పోలీసులకు స్పష్టం చేశారు. ప్రజలను వేధించే వారిపై, సోషల్ మీడియాలో రెచ్చిపోయే సైకోలపై కఠినంగా వ్యవహరించాలని ఆదేశించారు. భయంతో, కన్నీళ్లతో పోలీస్ స్టేషన్కు వచ్చే వారికి మానవీయంగా స్పందించాలని సూచించారు.







