అమరావతి: రాష్ట్రంలో ఆదివారం జరిగిన పట్టణ స్థానిక సంస్థల ఎన్నికల్లో ఓటర్ల నుంచి మిశ్రమ స్పందన కనిపించింది. సాయంత్రం 5 గంటల వరకు రాష్ట్రవ్యాప్తంగా 60.96 శాతం పోలింగ్ నమోదైంది. 2021 పట్టణ స్థానిక సంస్థల ఎన్నికల్లో నమోదైన 65.08 శాతంతో పోలిస్తే ఈసారి పోలింగ్ తగ్గింది. ఉదయం 7 గంటలకు పోలింగ్ ప్రారంభమైన తొలి రెండు గంటల్లో కేవలం 8.39 శాతం మందే ఓటు వేశారు.
కార్పొరేషన్ల వారీగా పోలింగ్
- ఒంగోలు – 71.27%
- మచిలీపట్నం – 70.83%
- కడప – 69.58%
- గుంటూరు – 56.15%
- విజయవాడ – 55.35%
- విశాఖపట్నం (జీవీఎంసీ) – 50.02%
- తిరుపతి – 46.85% (కార్పొరేషన్లలో అత్యల్పం)
మున్సిపాలిటీలు, నగర పంచాయతీల్లో చిమ్మకుర్తి 84.36 శాతంతో అగ్రస్థానంలో నిలవగా, ఆదోనిలో అత్యల్పంగా 53.60 శాతం పోలింగ్ నమోదైంది. మొత్తంగా కార్పొరేషన్ల కంటే మున్సిపాలిటీల్లోనే ఓటర్లు అధికంగా ఓటు హక్కు వినియోగించుకున్నారు.
బ్యాలెట్ పత్రాల్లో తప్పిదాలు
విజయవాడ మున్సిపల్ కార్పొరేషన్ 55వ డివిజన్లో వైఎస్సార్సీపీ, కాంగ్రెస్ అభ్యర్థుల గుర్తులు తారుమారయ్యాయి. గుర్తించిన అధికారులు వెంటనే పోలింగ్ నిలిపివేసి కొత్త బ్యాలెట్ పత్రాలు తెప్పించారు. దాదాపు రెండు గంటల జాప్యం తర్వాత పోలింగ్ తిరిగి ప్రారంభం కాగా, రాత్రి 7.30 గంటల వరకు ఓటింగ్కు అనుమతించారు. ఏలేశ్వరంలోని 3, 7 వార్డుల్లోనూ ఇదే తరహా సమస్యతో సుమారు అరగంట పోలింగ్ నిలిచిపోయింది.







