అమరావతి: విశాఖపట్నంలో గూగుల్ ఏర్పాటు చేస్తున్న భారీ హైపర్స్కేల్ ఏఐ డేటా సెంటర్ ప్రాజెక్టుకు ఆంధ్రప్రదేశ్ హైకోర్టులో తాత్కాలిక ఊరట లభించింది. ప్రాజెక్టు నిర్మాణ పనులను కొనసాగించేందుకు అదానీ గ్రూప్కు చెందిన ప్రత్యేక సంస్థ వైజాగ్ హైపర్స్కేల్ డేటా సెంటర్ పార్క్ లిమిటెడ్ (VHDCPL)కు బుధవారం అనుమతి ఇచ్చింది. అయితే, పెండింగ్లో ఉన్న ప్రజాహిత వ్యాజ్యం (పిల్)పై తుది తీర్పు వచ్చే వరకు చేసే పెట్టుబడులు, నిర్మాణ పనులన్నీ పూర్తిగా డెవలపర్ సొంత రిస్క్పైనే ఉంటాయని స్పష్టం చేసింది.
ధర్మాసనం ఏమన్నది?
ప్రధాన న్యాయమూర్తి జస్టిస్ లిసా గిల్, జస్టిస్ చల్లా గుణరంజన్లతో కూడిన డివిజన్ బెంచ్ ఈ కేసును విచారించింది. వర్తించే అన్ని నిబంధనలను పాటిస్తూ ప్రాజెక్టును ముందుకు తీసుకెళ్లవచ్చని పేర్కొంది. నిబంధనల అమలులో ఏ లోపం జరిగినా కోర్టు జోక్యం చేసుకుంటుందని హెచ్చరించింది. నిర్మాణ దశలో భారీగా ఖర్చు చేశామన్న కారణం చూపి, తీర్పు వ్యతిరేకంగా వస్తే ఆర్థిక పరిణామాల నుంచి తప్పించుకోలేరని స్పష్టం చేసింది. సంబంధిత పక్షాలు కౌంటర్ అఫిడవిట్లు దాఖలు చేయాలని ఆదేశిస్తూ తదుపరి విచారణను వాయిదా వేసింది.
పిటిషనర్ల అభ్యంతరాలు ఇవే
విశాఖ రూరల్ మండలంలోని అడవివరం, ముడసర్లోవ గ్రామాల పరిధిలో ఈ డేటా సెంటర్ నిర్మాణం జరుగుతోంది. ఈ ప్రాంతం కంబాలకొండ వన్యప్రాణి అభయారణ్యానికి, సమీపంలోని నీటి జలాశయానికి దగ్గరగా ఉందని పిటిషనర్లు వాదించారు. ప్రాజెక్టును 'కేటగిరీ బి' కింద వర్గీకరించి కఠినమైన పర్యావరణ మదింపు నుంచి తప్పించారని, కేంద్ర ప్రభుత్వ పర్యావరణ అనుమతి తప్పనిసరని పేర్కొన్నారు. గతంలో సింహాచలం దేవస్థానం ఆధీనంలో ఉన్న భూమిని పారిశ్రామిక అవసరాలకు బదలాయించడంపైనా ప్రశ్నలు లేవనెత్తారు. డేటా సెంటర్కు అవసరమయ్యే భారీ నీరు, విద్యుత్ వినియోగంపై స్థానిక పర్యావరణ కార్యకర్తలు ఇప్పటికే ఆందోళనలు చేపట్టారు.

_1.jpg)





