ఆంధ్రప్రదేశ్లో పల్లె పోరుకు రంగం సిద్ధమైంది. రాష్ట్రవ్యాప్తంగా 13 వేలకు పైగా గ్రామ పంచాయతీల్లో సర్పంచ్, వార్డు సభ్యుల స్థానాలకు మూడు విడతల్లో ఎన్నికలు నిర్వహించనున్నట్లు రాష్ట్ర ఎన్నికల కమిషనర్ అనిల్ చంద్ర పునేఠా గురువారం ప్రకటించారు. తొలి విడతకు శుక్రవారం (నవంబర్ 13) నోటిఫికేషన్ విడుదల కానుంది. ప్రతి విడతలోనూ పోలింగ్ ముగిసిన రోజే ఓట్ల లెక్కింపు చేపట్టి ఫలితాలు ప్రకటిస్తారు.
మూడు విడతల షెడ్యూల్
- తొలి విడత: నోటిఫికేషన్ నవంబర్ 13; నామినేషన్లు నవంబర్ 17 వరకు; పోలింగ్, ఫలితాలు నవంబర్ 26
- రెండో విడత: నోటిఫికేషన్ నవంబర్ 16; నామినేషన్లు నవంబర్ 20 వరకు; పోలింగ్, ఫలితాలు నవంబర్ 29
- మూడో విడత: నోటిఫికేషన్ నవంబర్ 19; నామినేషన్లు నవంబర్ 23 వరకు; పోలింగ్, ఫలితాలు డిసెంబర్ 2
ఒకే రోజు పల్లె, పట్టణ పోలింగ్
పెండింగ్లో ఉన్న 4 కార్పొరేషన్లు, 19 మున్సిపాలిటీలు–నగర పంచాయతీల ఎన్నికలకు కూడా ఎస్ఈసీ గురువారమే నోటిఫికేషన్ విడుదల చేసింది. ఆ 23 పట్టణ స్థానిక సంస్థల పోలింగ్ కూడా నవంబర్ 26నే జరగనుంది. దీంతో అదే రోజు పంచాయతీల తొలి విడత, పట్టణ సంస్థల ఎన్నికలు ఒకేసారి జరగనున్నాయి. మున్సిపల్ ఓట్ల లెక్కింపు మాత్రం నవంబర్ 30న ఉంటుంది.
ఎంపీపీ, జడ్పీ చైర్పర్సన్ ఎన్నికలు
ఎంపీటీసీ, జడ్పీటీసీ ఎన్నికలు ఇప్పటికే విజయవంతంగా పూర్తయ్యాయని ఎస్ఈసీ తెలిపారు. మండల పరిషత్ అధ్యక్షుల (ఎంపీపీ) ఎన్నిక నవంబర్ 19న, జిల్లా పరిషత్ చైర్పర్సన్ల ఎన్నిక నవంబర్ 20న జరగనుంది. దీంతో నవంబర్ నెల మొత్తం రాష్ట్రంలో స్థానిక ఎన్నికల సందడి కొనసాగనుంది.







