రాష్ట్రంలో స్థానిక సంస్థల ఎన్నికలకు అడ్డుగా ఉన్న ప్రధాన సమస్య పరిష్కారమైంది. పంచాయతీరాజ్ సంస్థల్లో బీసీ రిజర్వేషన్ల అంశంపై విశ్రాంత ఐఏఎస్ అధికారి రాజీవ్ రంజన్ మిశ్రా నేతృత్వంలోని కమిషన్ నివేదిక సమర్పించగా, దాని ఆధారంగా మంగళవారం (ఆగస్టు 18) ముఖ్యమంత్రి చంద్రబాబు నాయుడు నేతృత్వంలో సమావేశమైన కేబినెట్ కీలక నిర్ణయం తీసుకుంది. గ్రామ పంచాయతీ సభ్యులు, సర్పంచులు, ఎంపీటీసీలు, ఎంపీపీలు, జెడ్పీటీసీలు, జెడ్పీ చైర్మన్ పదవుల్లో బీసీలకు 34 శాతం రిజర్వేషన్ కల్పిస్తూ జీవో ఎంఎస్ నంబర్ 105ను ప్రభుత్వం విడుదల చేసింది. రిజర్వేషన్ల అంశం సద్దుమణగడంతో ఎన్నికల ప్రక్రియ వేగం పుంజుకుంది. రాష్ట్ర ఎన్నికల కమిషనర్ అనిల్‌చంద్ర పునేఠా మున్సిపల్ కార్పొరేషన్లు, మున్సిపాలిటీలు, నగర పంచాయతీల పరిధిలో ఫొటో ఎలక్టోరల్ రోల్స్‌ను సెప్టెంబర్ 3న ప్రచురించాలని అధికారులను ఆదేశించారు. జనవరి 1, 2026 తేదీని ప్రామాణికంగా తీసుకుని తుది ఓటర్ల జాబితాలు రూపొందించనున్నారు. ఈ ప్రక్రియ పూర్తయ్యాక మేయర్లు, మున్సిపల్ ఛైర్మన్లు, కార్పొరేటర్లు, కౌన్సిలర్ స్థానాలకు రిజర్వేషన్లు ఖరారు చేయనున్నారు. తొలుత పట్టణ స్థానిక సంస్థలైన కార్పొరేషన్లు, మున్సిపాలిటీలు, నగర పంచాయతీలకు ఎన్నికలు నిర్వహించి, తర్వాతి దశలో గ్రామ పంచాయతీలకు పోలింగ్ చేపట్టే యోచనలో ప్రభుత్వం ఉంది. అన్ని సన్నాహాలు వీలైనంత వేగంగా పూర్తి చేయాలని మున్సిపల్ పరిపాలన, పంచాయతీరాజ్ శాఖలకు స్పష్టమైన ఆదేశాలు జారీ అయ్యాయి. దీంతో సెప్టెంబర్ లేదా అక్టోబర్ నెలల్లో పోలింగ్ నిర్వహించే అవకాశం ఉందని రాజకీయ వర్గాలు అంచనా వేస్తున్నాయి.